កណ្ដាល៖ នាយករដ្ឋមន្ត្រី ហ៊ុន ម៉ាណែត បានណែនាំទៅកាន់រដ្ឋមន្ត្រីរបស់លោកថា ប្រសិនជាពួកគេមានការងារសំខាន់រវល់ មិនចាំបាច់មកអមដំណើរលោកក្នុងពិធីសាធារណៈគ្រប់ពេលនោះទេ។

ថ្លែងនៅក្នុងពិធីជួបជាមួយនឹងកម្មករជិត ២ម៉ឺននាក់នៅក្នុងក្រុងតាខ្មៅខេត្តកណ្ដាលព្រឹកថ្ងៃទី០១ ខែកញ្ញា ឆ្នាំ២០២៣ លោក ហ៊ុន ម៉ាណែត បានណែនាំទៅកាន់ក្រុមពិធីការពិនិត្យមើលករណីនេះ។

លោកបន្ថែមថា ប្រសិនជារដ្ឋមន្ត្រីណាមិនអាចចូលរួមកម្មវិធីសាធារណៈជាមួយលោកបាន សូមចាត់ឲ្យរដ្ឋលេខាធិការម្នាក់មកចូលរួមជំនួសគឺគ្រប់គ្រាន់ហើយ។

លោកថា ការចូលរួមជាមួយលោកនៅក្នុងកម្មវិធីសាធារណៈគឺបង្ហាញនូវសាមគ្គីភាពក្នុងជួរថ្នាក់ដឹកនាំជាមួយនឹងប្រជាពលរដ្ឋ។

លោកថា៖ «បម្រើប្រជាពលរដ្ឋគឺជាអ្វីដែលយើងត្រូវធ្វើ»។

នេះគឺជាកម្មវិធីសាធារណៈទី២ របស់លោកនាយករដ្ឋមន្ត្រី ហ៊ុន ម៉ាណែត បន្ទាប់ពីកាន់ការងារជានាយករដ្ឋមន្ត្រីនៅថ្ងៃទី២២ ខែសីហា ឆ្នាំ២០២៣។ កម្មវិធីរបស់លោកត្រូវបានមើលឃើញថាបានអមដំណើរទៅដោយឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រីនៃរដ្ឋាភិបាលអាណត្តិថ្មីជាច្រើន៕